அன்புள்ள ஜெ ,
மழைப்பாடலில் சகுனி வரும் ஆரம்ப பகுதிகளில் இரு உள்கதைகள் வருகினறன , ஒன்று நாகசூதன் சகுனியிடம் சொல்லும் தங்களை தாங்களே தின்று உயிர்வாழும் சூழல் இருக்கும் உளவியல் கதை , இன்னொன்று காந்தார நில வரலாறினை அறிந்து கொள்ள உதவும் பாவகன் , பவமானன் உள்ளிட்டவர்கள் வரும் புராண கதை .
வரலாற்றுப்புராண கதை வழியாக நிஜ வரலாறை அறிந்து கொள்ள முடிகிறது . மூன்று அக்னி தெய்வங்கள் ,மூன்று காற்று தெய்வங்கள் என இந்த ஆறு தெய்வங்களும் துர்வசு வழியாக காந்தாரத்திற்குள் வந்தவை அல்லது நுழைந்தவை , இந்த ஆறு தெய்வங்களின் மனைவிகளாக வரும் பெண் தெய்வங்கள் லாஷ்கரர் பழங்குடியினற்க்குரியவை , இந்த பெண் தெய்வங்கள் அந்நிலத்திலேயே ஆதியில் இருந்து வரும் பழங்குடி தெய்வங்கள் , அதனால்தான் லாஷ்கரர்கள் இந்த பெண் தெய்வங்களை மட்டும் வணங்குகின்றனர் , இந்த பெண் தெய்வங்களுக்கு என தனியாகவே மரத்தடியில் பீடங்கள் தொல் காலம் தொட்டே இருக்கின்றன .
பாவகன் , பவமானன் , சூசி போன்ற அக்னி தெய்வங்கள் நிழல் தரும் மரங்களான ஸாமி ,பிலு ,களிர் என மரங்களாக மாறின என்பது மிக அழகிய எதிர்மாற்றம் , அது போலவே காற்று தெய்வங்கள் நகர உதவும் விலங்குகளான கழுதை, ஒட்டகம் , குதிரையாக மாறின என்பதும் கவித்துவமானது , அதுவும் சிலைகளில் இவைகள் இறக்கை கொண்டிருப்பது இன்னும் அழகானது .
உருவகமாக ஆண் தெய்வங்கள் துர்வசுவை சேர்ந்தவர்களாகவும் , பெண் தெய்வங்கள் லாஷ்கரர்களை சேர்ந்தவர்களாகவும் எண்ணினேன் , லாஷ்க்கரர்கள் அன்னை வழிபாட்டாளர்கள் , இவர்கள் துர்வசு சார்ந்தவர்களை சேர்த்து கொண்டதைத்தான் கோவிலில் பூமாதேவி ஆறு நிலமகள்களை வழங்கினாள் எனும் புராண கதை வழியாக சொல்லபடுகிறது என எண்ணினேன் .
மேலும் லாஷ்கரர் பழங்குடியினரின் மிக தொல் கால பூஜை முறையினை குறிப்புஉணர்த்தின , நேரடியாக எந்த வழிபாட்டு சொற்களும் இல்லாத மிருகங்களின் ஓசைகளை கொண்டு நிகழ்கிறது , மேலும் பூசைக்கான ஓசை கருவியாக பறை இருப்பதும் , மேலும் நேரடியாக இரத்தத்தில் தொட்டெடுத்த அப்பங்களை பிரசாதங்களாக கொடுக்கும் முறையும் தொல் கால பூசைமுறையினை கண்முன் கொண்டு வந்தன .
துர்வசுவின் வழியான தெய்வங்களும் , லாஷ்கரர்களின் தெய்வங்களும் இணைந்தாலும் ஒன்றை ஒன்று அழிக்க வில்லை ,மாறாக இணைந்து கொள்கின்றன , இந்திய கலாசாரத்தின் சிறப்பியல்பு இது என எண்ணி கொண்டேன் .
....
பூத்து கிடக்கும் தாலி பனையை கண்டடையும் நிகழ்வும் அழகானது , அதுவும் அந்த பனையை முதலில் கண்ட பெண் சித்தமிழந்து , நிலையழிந்து நிற்கும் சில கணங்கள் அழகானவை , உண்மையில் சித்தமிழந்து , நிலையழிந்து என நம் மரபில் இருக்கும் சொற்களின் அர்த்தம் அறிய உதவும் தருணங்கள் இது .
......
ராதாகிருஷ்ணன்
